Welcome…

Shalom,

Selamat datang di situs Blog HKBP Malang…

Tuhan berkati,

Horas…

Jamita Kebaktian Sektor Minggu ke-3 Bulan November 2010

Hesekiel 39 : 1 – 7

oleh : Pdt. S.J. Lumban Gaol, STh

1.     Disuru Debata do Si Hesekiel manurirangi dompak Si Gog , Raja na sian tano Magog ( = Asia Tengah ),  jala  induk/pemimpin  koalisi ni harajaon Ros ( = Russia ), Mesek ( =Turki )  dohot  Tubal  ( =Turki ), paboahon na ro ma  Debata marlulu ( = menjadi lawan ) tu harajaon koalisi na bidang  i  ala sai mangasa gogo naeng mangago  halak Israel. Asing ni harajaon koalisi i adong dope angka harajaon  na mendukung Magog  ima , harajaon Parsi, Kus, Pud, Gomer dohot Togarma ( bd.38:5-6 ). Sude harajaon i satahi naeng mamorang Israel. Alai ndang paloason ni Debata  nasida laho mangago Israel. Na pasti ondingan ni Debata do bangsoNa maralohon angka bangso  parbegu i

 

2.     Alai asa tung haru diboto angka bangso parbegu i ise JAHOWA Debata ni halak Israel i, dibahen i haraon jala togihonon ni  Debata do nasida  ro marrongoman sian ujung ni utara . Mansai nania do antong torop nasida,  huhut  mamboan sinjatana be ,  mambaen  strategi perang na mansai hebat. Marhite i dirimpu  nasida   boi sangkidop mata papatuhon  tano Israel, hape ndang songon na nirimpu ni rohana i  kenyataanna. Continue reading

Jamita Kebaktian Sektor Minggu ke-3 Bulan Oktober 2010

Mateus 24 : 4 – 13

Oleh : Pdt. S.J. Lumban Gaol, STh

1.      Turpuk on ima panurirangon ni Tuhan Jesus taringot tu halelengse ni huta Jerusalem dohot ajal ni hasiangan on. Disurirangkon Jesus i di na lam jonok tingkina maninggalahon tano on,mulak tu habangsana hian tu surgo. Hatiha turpuk on tongon di Jerusalem do Jesus raphon angka siseanna beribadah di bagasjoro. Simpul beribadah ruar ma nasida sian bagasjoro i alai huhut ma didok angka sisean i tu Jesus kekaguman dohot kebanggaan nasida di hinauli ni huta Jerusalem i (ay.1). Tutu do na nidok ni sisean i ,ai ndang adong songon i hinauli ni bagas/huta di   humaliang i. Alai aha ma didok Jesus tu sisean i taringot tu huta i ?. “Situtu do hatangkon tu hamu : Ndang pasombuonna sogot disi dua batu martinditindi na so gargaronna” (ay.2).Lapatanna di sada tingki malengse do huta Jerusalem i. Tontu tarsonggot do angka sisean i umbege i. Mungkin do magargar huta Jerusalem na uli I ? Beha ma pargargarna,jala ise manggargar ? Alai tahe molo nunga disurirangkon Jesus songon i  ingkon saut do i masa.

 

2.      Ala ni boaboa  i  balisaon ma roha ni angka sisean i ingin mengetahui lebih jauh taringot tu  Jerusalem i. Gabe dipatangkas nasida ma i muse  tu Jesus uju hundul (manatap)  di dolok Jetun tondongkon ni Jerusalem i : Andigan ma hamamasa ni i ? Songon dia ma muse nang  taringot  tu haroro ni Jesus  dohot ajal ni hasiangan on ?  Jala angka dia ma tanda patujolo (pra -kejadian) siidaon disi? Ringkot situtu do i asa adong hian pangaradeon diri di angka sisean. Ai manang sadihari pe ro na masa i ndang be tarsonggot ala nunga be rade mangadopisa (ay.3).

 

3.      Alus ni Jesus domu tu sungkun-sungkun ni angka sisean i : Na parjolo,mullop ma “Kristus pargapgap”, ima angka panurirang panjahutjahut  na manoluk Goar ni Tuhan Jesus jala barani menyatakan dirina  Kristus . Sipaotooto do i laho mangaliluhon torop halak. Dijagahon ma i (ay.4-5). Na paduahaon,masa ma angka hamusuon (deru perang) dohot soara ni na marmusu (kabar tentang perang). Ai marporang ma bangso maralohon bangso,harajaon maralohon harajaon na di tano on secara global.  Akibat ni porang i manginona ma tu masalah ekonomi ,masa  ma kelaparan,songgop ma haporsuhon. Ala hajahaton ni jolma i muruk ma alam,ro ma lalo marluatluat mambahen lam tu singkorna  parniahapan i. Jala  i parmulaan ni pambebeon dope i didok Jesus (ay.6-8).  Na patoluhon, hehe ma  angka bangso na so mangkalomohon harajaon ni Debata na binoan ni Jesus mamusui ,paporsukporsuk huhut mamusa angka na mangihuthon Kristus. Adong ma na targasip,gabe masijehean jala masihosoman. Soluk ma muse panurirang pargapgap mengobokobok keadaan mangaliluhon torop jolma. Akibatna tarjadi ma khaos ,masa ma na so uhum,holong manusiawi pe  ngali ma. Alai nang pe songon i rumang ni keadaan i ,adong do angka na togar  manahan di haporseaon jala satia marsihohot di harajaon ni Debata. Malua do nasida dihophop Tuhan i (ay.9-13). Jadi las ni roha do di ujungna.

 

4.      Panimpuli :

Angka haulion na di tano on, beha pe jagarna ingkon salpu do I di tingkina. Unang ma pola tahabanggahon i.

Na sintong do nahinatahon ni Tuhan Jesus, i ma tahaposi jala tapaima.Agia pe guntur portibi on digaori angka parpoda haliluon asa roa harajaon ni Debata,alai ianggo hita atik pe godang manaon haporsuhon,tetaplah setia.

Hophopon ni Tuhan I do hita jala paluaonNa.Monang di ujungna ! I ma las ni rohanta.I do sihabanggahononta.

Jamita Kebaktian Sektor Minggu ke-1 bulan Oktober 2010

1 Timoteus 4 : 13 – 16

oleh : Pdt. S.J. Lumban Gaol, STh

1.      Adong dua sisean ni Si Paulus apala na jonok tu ibana jala na jotjot diboan tu luat ni sipelebegu laho mamaritahon barita na uli,ima Si Timoteus dohot si Titus. Atik pe bajar/poso dope pamatang ni sisean on tung dilehon do  sandok rohana,pingkiranna , gogona dohot haporseaonna tu ulaon pamaritahonon di  barita na uli i. Beha ma haru asa  sahat haluaon I tu saluhut  bangso  di tano on. Alani I do umbaen mansai holong jala lomo roha ni apostel I tu siseanna na dua on. Songon sada guru pembimbing,tontu  dituntut do sian siseanna i asa gogo jala marsitutu mangula ulaon i. Dihirim do asa marparbue jala marpanumpak na niula nasida . Alai asa saut songon i tontu ingkon lehonon ni Si Paulus do pambohalion (=pembekalan). Pambohalion i ndang sae sahali manang duahali,ingkon jotjot do asa tung dasip jala tau sisean i. Domu tusi ma nuaeng na taida di turpuk on.

2.      Dipaboa Si Paulus do di na lam tu hembangna huria i, ganda torop ni halak porsea di Tuhan Jesus Kristus, laos mullop do nang angka parpoda haliluon, ima angka na marbalik sian huria gabe manangihon tondi sipaotooto sian sibolis laho paroaroahon huria i. Marusaha do parpoda haliluon i manaburhon angka hata gapgap marhite argumentasi-argumentasi na paotootohon  patata roha ni ruas ni huria i asa godang marbalik. Mangadopi i tontu ingkon gogo do mental,moral dohot spiritual. Ingkon bagas do muse nang parbinototan/pangantusion di hata ni Debata asa boi mangalusi dohot manaluhon poda haliluon i. I do alana umbahen disosoi apostel i siseanna si Timoteus on asa torus melengkapi diri marhite na mandatdati manjahai Buku na Badia I asa bagas parbinotoan teologina. Marhite i muse gabe tau ma ibana mangapoi (=membangun iman warga jemaat) dohot mangajarhon poda na tingkos i asa lam tangkas diboto jala diantusi angka ruas ni huria hinasintong ni Barita na Uli I (ay.13).

3.      Dipaingothon apostel i do muse Si Timoteus domu tu hadirionna. Atik pe bajar/poso pamatangna alai nunga dipasahat  tu ibana silehonlehon (=karunia) panurirangon  marhite penahbisan sian angka sintua (=sidang penatua,ay.14 ) . Asa dihaburjuhon mangaradoti i sotung  neang rohana disi. Ndang marnida umur manang kondisi pisik umbaen ditodo Si Timoteus gabe naposo ni Tuhan i,tung ala ni torus ni rohana do mamelehon diri. I ma tongtong dipasarisari jala diparangehon. Lambat laun  manaek ma kwalitas pelayananna,terbangun ma karakter dohot kredibilitas na mansai denggan idaon ni humaliang (ay.15).Tamba ni muse,asa tetap terjaga karakter dohot kredibilitas na denggan ingkon tongtong ma dimatahon (=diawasi) dirina dohot hapolinon ni poda na niajarhonna. Murni dan konsisten . Marhite i dihalomohon jala ditangihon halak ma ibana dohot poda na binaritahonna (ay.16).

4.     Panimpuli:

  • Nasa  ruas ni huria tarlobi parhalado ingkon  ringgas  do manjaha buku na badia i dohot buku-buku na mardomu tusi laho patanakhon pangantusion,patogu haporseaon dohot pahothon hasatiaon mangoloi Tuhan i sahat ro di ujungna.
  • Angka silehonlehon (=karunia) na marragam na tajalo sian Tuhan i tapangke ma i tu ulaon pahembanghon asa marbungaran harajaon ni Debata di portibi on.
  • Tamatahon be ma dirinta dohot hurianta asa tongtong terjaga kredibilitasta dohot nama baikta tu humaliang. Hinorhon ni i gabe tartait ma roha ni donganta ro tu garejanta.

Jamita Kebaktian Sektor Minggu ke-5 Bulan September 2010

Maleaki 2 : 13 – 16

oleh : Pdt. S.J. Lumban Gaol, STh

  1. Tarjou Si Maleaki gabe panurirang hira-hira di taon 450-an s.Masehi,dung tinggal menetap halak Israel Juda di tanona dungkon mulak sian habuangan Babel. Ibana do panurirang na parpudi di Padan na Robi na mangula di Jerusalem. Jala di ombas i tardok ndang marrumang harajaon be Israel Juda,rumang pemerintahan na imbaru (versi lain) nama ala nunga sanga leleng hona jajah.
  2. Dungkon mulak halak Israel Juda tu Jerusalem manigor dipauli nasida do huta naung maloha i dohot bagas joro i. Dipatota Si Sesbasar,Si Ezra,Si Nehemia dohot angka donganna na asing do muse komunitas parbangsoon nasida naung sanga hubar-habir i dohot ngolu parugamoon naung sanga ngali i . Nanget-nanget tarida do  panghorhonna , lam tu denggan ma parbangsoon dohot parngoluon nasida jala marhademahon.
  3. Alai songon i do huroho angka parrohaon ni jolma, ndang  boi  manongtong . Mura lupa di angka na denggan. Angka hatontuan,patik,padan dohot  ruhut na mangihot na  ingkon radotan nasida asa tongotng tercipta ketertiban dohot kedamaian,ndang be diulahon. Alani i ,ro ma Debata marhite  panurirang Maleaki manorui angka malim dohot angka halak Juda. Didok tu angka malim : Songon suruan ni Debata,sian bibir nasida do nian tarbege parbinotoan,pamodaion dohot sipaingot,hape gabe gasip do nasida. Ingkon marlea jala tarjepol nasida bahenon ni Debata. Suang songon i halak Juda, ndang diingot be tona ni ompu nasida na mamatikhon na so jadi mambuat boru ni halak pardebata sileban manang muli tu anak ni halak pardebata sileban. Hape dihalupahon jala diose nasida do patik i. Didok Debata , pangalaosion nasida i doshon na mangaramuni bagas habadiaon ni Debata do I (ay.11). Alai apala na mangkagigihon  roha ni Debata  ima parsombaon na sipaula (=formalitas) : Mamboan pelean tu Debata huhut mardongan iluilu partangison dohot hoihoi,hape ndang sian nasa ias  dohot burju ni rohana . Tontu ndang lomo roha ni Debata manjalo angka pelean sisongon i (ay.13). Ala so dijalo Debata, gabe sungkun-sungkun ma  nasida : Beasa ulaning ndang olo Debata manjalosa? Alusna,ala ndang badia be dibahen halak Juda lembaga parsaripeon  i ,nunga dipaolooloi hisap ni dagingna mangihutihut hasomalan ni halak parbegu (ay.14). Debata do pahothon parsaripeon i jala Debata do nang mangalehon pinompar. Dibaheni  ingkon badia do parsaripeon i,unang ditoisi/diramuni. Parsaripeon naung ojak sian mulana i,ingkon hot i dipartahanhon sahat ro di ujungna. Setialah ! Tung dihasogohon Debata do parsirangan,aha pe alasanna. Ganup ma manjaga tondina unang olo mangose (=menghianati) padan parsaripeon i  (ay.15-16).
  4. Panimpuli :

  • 1. Malo do jolma  marsandiwara tu dirina. Sai songon na burju mar- Tuhan ,ringgas beribadah hape sipaula. Molo jujur  hita tu dirinta be jala taongkui, mansai godang do  kemunafikanta di ngolu on. Deba halak mangarimpu marhite ibadah formalitas i boi tarhuphupi angka haroaonna i. Tu sesama dongan do boi  tarhuphupinoni, alai di mata ni Debata patar do sudena.
  • 2. Ala marhahonaan do turpuk on tu parsaripeon, Debata mandok : Ingkon badia do  parsaripeon i ai na badia do Tuhan Debata na pahothon parsaripeon i. Alani unang taramuni i marhite na paololoi hisap ni daging. Dipatikhon do muse tu angka ianakhon  baoa dohot boruboru asa marhasohotan/marhamulian ganup nasida be tu sesama dongan sahaporseaon. Sai unang tarela gabe masuk tu keyakinan ni na niolina I manang tu hamulianna i. Unang marlea  Debata  ala  marsaripe na ramun. Tapasangap ma Ibana di parsaripeonta na badia.

Jamita Kebaktian Sektor Minggu Ke-4 Bulan September 2010

Rom 6 : 18 – 23

Oleh : Pdt. S.J. Lumban Gaol, STh

  1. Ganjang do dipatorang apostel Paulus taringot tu dosa on  mulai sian bindu tolu. Marhite sian sada halak do (= Si Adam jolma na parjolo i na mangalaosi Patik ni Debata) ,umbaen bongot dosa i tu portibi on. Panghorhon ni dosa i ro ma hamatean. Songon i ma dosa/hamatean i manggomgomi mulai sian si Adam sahat ro di angka sundut na mangihut. Sude do jolma mardosa,ndang adong na lias  nanggo sada pe sian dosa i. Nang halak Jahudi na mangarajumi dirina sumurung sian angka bangso na asing, ndang lias sian dosa. Alai tahe,tagamon boi dope malua jolma pardosa naung ginomgoman ni hamatean i ? Boi ! Ai marhite sian pangalaosion ni sada halak (=Adam na parjolo ) songgop uhum hamagoan tu saluhut jolma,laos marhite sian pangoloion ni sada halak do muse (=Adam na paduahon) ro haluaon  tu saluhut jolma. Asi ni roha ni Debata na so hasuhatan I marhitehite pengorbanan/panaonon ni Jesus Kristus ,I do na pangoluhon jolma i sian dosa hamatean.
  2. Nunga salpu be tingki pangadopan ni jolma di dosa i. Ndang be hatoban pangoloi  na  mamboan tu hamatean, ai nunga dipalua asi ni roha Debata  jolma i. Nuaeng gabe tunduk mangoloi  hatigoran ni Debata nama ,lapatanna mardalan di dalan na sintong,marparange hombar tu ruhut ni poda na tingkos. Tagan di hagaleon ni daging i hibul do dipasahat  jolma i ruasna tu  hahodaron,tu hajahaton jala mangulahon na so uhum. Alai dungkon di bagasan haluaon i,  hibul ma dipasahat jolma i muse dirina tu hatigoran dohot tu habadiaon. Unang  alang,rupani deba tu hadosaon,deba nari tu hatigoran. Ndang boi songon i. Ingkon tangkas do keberpihakan: Sandok bulus jala gok di Debata.
  3. Tutu andorang diparhatoban dosa jolma i,bebas do jolma i sian hatigoran (kebenaran).Bebas na dimaksud ndang bebas dalam arti selamat. Ndang ! Alai bebas dalam arti sesuka hati mangulahon angka ulaon na  jat, so  pola adong sihabiaran, manang na mangorai, manang na maminsang,manang na pasingothon pe,sandok guru lomo ni rohana be ma dibahen. Alai tahe dibagasan na bebas i ,adong do pangkorhon/parbue na denggan sian i dijalo jolma i ? Jelas do ndang adong,baliksa hamagoan (hamatean) do hapateanna. Nuaeng dung malua (=selamat) jolma i sian dosa hamatean i jala gabe pangoloi di Debata, adong do parbuena na mansai uli situtu ima ,ndang be mangolu dibagasan haramunon ni dosa,alai nunga mangolu di bagasan habadiaon na sian Tuhan i. Jala hapateanna ima hangoluan na salelenglelengna. I do basabasa ni Debata na so tarasam jala na so halompoan i ,na nilehonNa (=dianugerahkan) marhitehite AnakNa Tuhan Jesus Kristus.
  4. Panimpuli :
  • Nunga dipalua Jesus Kristus hita sian dosa. Ndang be hatoban ni dosa be,alai nunga gabe jolma na merdeka,jala anak ni Debata. Alani, hibul ma tapasahat sandok ruas ni dagingta  tunduk jala polin mangoloi hatigoran.
  • Upa tinuhor ni dosa do hamatean. Alai nunga ditobus Jesus Kristus be hita sian hamatean i marhite mudarNa na arga i ,jala basabasahononNa ma muse tu hita hangoluan salelenglelengna. Asa sahat jaloonta i sogot, mangolu ma hita di habadiaon.

Jamita Kebaktian Sektor Minggu ke-3 bulan September 2010

1 Johannes  2 : 11 – 17

oleh : Pdt. S.J. Lumban Gaol, STh

  1. Adong dua unsur hagogoon na maralo (berlawanan) ,ima hatiuron dohot haholomon manang na torang dohot na golap. Hatiuron disimbolhon do i tu hal-hal na bersifat baik,jala haholomon disimbolhon tu angka hal-hal na bersifat jahat. Terang adalah yang surgawi dan gelap adalah yang duniawi. Tiur/torang na sian Debata ma i,holom/golap na sian sibolis ma i. Didok Apostel Johannes dison; Ia dung gabe halak Kristen sasalak i nunga mian be ibana di bagasan ngolu hatiuron,ndang be di haholomon.Lapatanna,dirina dohot nasa panggulmitonna nunga manondanghon hatiuron. Alani  i roha hosom (=haholomon) na mambahen parbadaan dohot parmusuon nunga  ambolong be i. Holong (=hatiuron) sebagai landasan hidup baru na manonun parsaoran na denggan tu sesama, i nama siparangehonon.
  2. Marhite suratna on dilehon  Apostel i do sipaingot secara khusus tu  na tolu horong on : Horong  anak, horong dolidoli dohot horong  ama. Ondolan ni pamodaionna ima,asa membuktikan diri paboa na so dibagasan huaso ni portibi na holom on be nasida ,alai nunga be dibagasan huaso ni hatiuron na sian ginjang i. Dasor manang alasan pamodaion tu ganup horong. Na parjolo tu horong anak ,ala naung sesa dosa nasida marhite Goar ni Tuhan i. Songon ama na mengampuni anakna di angka hagaleonna ,hahuranganna,hasalaanna,laos songon i do Tuhan i mengampuni   saluhut jolma sian nasa dosana be. Anak na nidokna dison boi do angka dakdanak na metmet alai boi do angka halak Kristen/ruas ni huria na imbaru porsea  di Jesus Kristus,na otik dope parbinotoanna, alani  ingkon manjalo pangajarion dohot panogunoguon asa lam torang mangantusi . Na paduahon tu horong dolidoli,ala naung ditaluhon hamu parjahat i. Di dolidoli (orang -muda) do jumpang gogo (kekuatan) umbaen nasida disuru tu partontangan. Dolidoli na minaksud ni apostel  dison boi do naposobulung,alai boi do angka ruas ni huria naung lam ganda parbinotoanna,hatauonna, pangantusionna jala lam tang  haporseaonna. Marhite i gabe margogo ma nasida mandopang jala manaluhon musu ni huria i. Na patoluhon tu horong ama (bapa-bapa),ala ditanda hamu Ibana na sian mulana i. Ama na nidokna dison boi do angka natoras/natuatua, alai boi do nang angka ruas ni huria naung tangkas matoras di hakristenon dohot di haporseaon. Lam leleng mangolu dihakristenon tontu lam tangkas ma mananda Tuhan i jala lam matoras marhaporseaon. Ruas naung matoras i ma muse gabe silehon poda tu angka dolidoli dohot anak na metmet.
  3. Sahali nari diingothon apostel on muse na tolu horong on : Ia portibi na holom on sai manawarhon hagiot ni daging,kepuasan mata dohot pamer hidup . Asa jamot,so tung mulak be tu bangko hagolapon i. Ndada  lao papuashon hagiot ni pamatang  portibi on be daging on, palashon roha ni Debata nama. Hata na sintong  do on : Nasa na di portibi on dohot na pinarhagiotna na laho salpu do. Antong molo salpu do i ,ndatung sihaholongan be i. Angka na hot ro di salelenglelengna I do sihaholongan ima : Mangulahon lomoni roha ni Debata,hot marhaporseaon di bagasan Kristus. Hidup dalam terang .
  4. Panimpuli : Domu tu haruasonta be songon halak kristen.  Di horong dia  hita  nuaeng tahe ? Molo di horong anak dope,taeahi ma asa lam tu torasna hakristenonta i. Molo nunga di horong dolidoli, gogo ma tataluhon musunta jala tahamonangkon paraloan haporseaon i. Molo nunga di horong ama/natoras hita, gabe tiruan jala silehon poda ma hita tu donganta. Las ma rohanta jala taingot ma ! Nunga mian di hatiuron hita dibaen Tuhanta, ndang be di haholomon. Alani i parange,parulan dohot nasa panggulmiton ni ngolunta tiur ma. I do lomo ni roha ni Tuhanta. Hita naung mian di hatiuron  do na manghirim ngolu na hot ro di salelenglelengna.
Follow

Get every new post delivered to your Inbox.