Jamita Kebaktian Sektor Minggu ke-4 Bulan Agustus 2010

Rom  13 : 8 – 10

oleh : Pdt. S.J. Lumban Gaol, STh

  1. Tajaha  ayat 1-7 andorang so turpuk epistel  on : Songon dia didok Apostel  Paulus sikap ni halak Kristen maradophon panggomgomi na marsahala ? Ima unduk,ndang jadi aloon,ala sian Debata do sahala pangomgomion  i. Suruan jala parhobas ni Debata do panggomgomi i laho manumpak parripena (untuk kebaikan  warganya). Mangihuthon kepercayaan ni halak Rom,ia Kesar i titisan  dewa do i. Alani  i do umbaen disomba jala dipasangap timbo. Umumna panggomgomi ndang mangkalomohon keberadaan ni huria di luat na ginomgomanna. Taringot tuson nunga dilumbahon Jesus hian, na ingkon adopan ni angka halak Kristen do hambatan na koras dohot pangaleleon jala toguonna tu jolo ni panggomgomi dohot raja ( Mat.10:17-18). I do na binereng ni Apostel i,bahwa keberadaan Gereja (=orang Kristen) ndang boi so mangadopi hamaolon. Alani i,songon dia ma halak Kristen parade dirina tusi ? Kehadiran ni barita na uli dohot keberadaan ni huria di tongatonga ni bangso dohot panggomgomi na mian di haholomon (=kafir), naeng ma mamboan hatiuron,haimbaruon, hadengganon dohot haluaon.
  2. Marparange hatiuron (Ep.8),marparange na dengan (1 Pet.2:12),i do  hadirion/jatidiri na ingkon patuduhonon ni halak Kristen didia ibana maringan. Marhite parange i nanget-nanget gabe jaloon ni pangisi ni huta/luat i ma nasida. Taida ma di turpuk on angka parange dia ma didok apostel i na patut patuduhonon ni halak Kristen na di Rom ima : Unang marutang manang tu ise pe ! Bidang do na hinangkam ni hata marutang dison. Rupani, marutang pangalaho,marutang ulaon,marutang hata,marutang pambahenan,dln.Songon na nidok ni apostel  i di 1 Kor.10:16 :”Ai molo huhatahon barita na uli,ndang hasurunganku i ; utangku hian do i. Marjea do au molo so huhatahon i !”. Ulaon mamaritahon barita na uli utang na ingkon sigararon do i mangihuthon si Paulus. Ingkon songoni ma halak Kristen na di Rom asa mamaritahon barita na uli marhite sikap dohot parulan nasida na denggan. Utang do  molo ndang diulahon.
  3. Mangkaholongi dongan/masihaholongan apala i do sintuhu ni patik ni Debata. Holong on ndang mamereng rupa manang bohi . Ndang merasa dirina sumurung manang lebih utama sian angka donganna na asing. Sandok dos do sude hajongjongan ni jolma i ,jala rajuman ma i doshon diriniba sandiri. Holong   on ma na ingkon pataridahonon/parbuehonon ni angka halak Kristen di tongatonga ni luat/bangso Rom. Sifat manang perilaku ni halak naung  memiliki holong on  dao do sian angka ulaon na jat na maralo tu patik ni Debata,ima : Ndang mangalangkup,ndang mamunu,ndang manangko,ndang manghaliangi,dohot angka parulan na roa na asing i.Tung suhar-suhar ni angka pangalaho na jat,na roa,na ramun, na somal diulahon halak kafir, i do na naeng patuduhonon ni halak Kristen. Halak parholong ni roha tontu ndang ulahononna na roa tu dongannna so holan na uli. Halak na tutu parholong ni roha  sai hadengganon do dipingkiri , asa jumpang suasana las ni roha.
  4. Sipahusorhusoron :
  • Didok  Tuhan Jesus : Holong do na manghamham nasa patik dohot hata ni panurirang. Manghaholongi dongan jolma doshon diriniba,i do  patik raya na paduahon , na dos argana dohot patik raya na parjolo,ima manghaholongi Tuhan Debata (Mat.22:33-40). Sian angka parbue ni Tondi, holong do na parjolo (gal.5:22). Didok Si Paulus holan tolu do na hot,jala haholongon do na umbalga (1K0r.13:13).Tanda ni halak Kristen na tutu,ima : Tongtong mandasori jala patujolohon “holong” na polin i di nasa ulaonna, panghobasionna, panggulmitonna, parsaoranna, dohot sude aktivitas ni ngoluna ,baik sebagai warga negara,warga gereja dohot warga masyarakat. Panumpak ni haholongon i, gabe jumpang ma hademahon,hadameon,hasonangan dohot las ni roha.
About these ads

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Follow

Get every new post delivered to your Inbox.

%d bloggers like this: