Jamita Kebaktian Sektor 12 Mei 2010

Turpuk Jamita: Psalmen 110 : 1 – 7

Digoari  do turpuk on Ende sian si David. Ia rumang manang isina ima panurirangon taringot tu tohonan/jabatan raja dohot malim (imam) na diampehon Debata tu Mesias i. Molo didok panurirangon, na paboahon manang mangalumbahon angka aha ma  na naeng masa  tu angka ari na naeng ro. Holan Debata do na  umbotosa, alai dipaboa ma i muse marhite angka naposoNa tu sihatoropan (masyarakat umum) asa mamoto jala asa adong pangaradeon. Panurirangon i ndang ramalan i, alai hatontuan na pasti masa do i di tingki na binuhul ni Debata. Adong do tolu tohonan ni Mesias i ima: Panurirang, Malim dohot Raja. Turpuk on manaringoti na mardomu tu tohonan Malim dohot Raja do. I ma nuaeng taida.

Tajaha di ayat 1-3: Torang do dipaboa di panurirangon ni si David on: Jahowa sandiri do mandok tu ”Tuhan ni si David” (maksudna Mesias i ) na pahundulonNa Mesias i di siamunNa. Hata hundulan na nidokna disi ima habangsa-harajaon. Pasahaton ni Debata ma  tungkot harajaon (kekuasaan) tu Mesias i laho mangarajai Sion (Bangso Israel/Jerusalem) dohot angka musana  (Bangso parbegu). Asa  gabe Raja ni angka raja ma Ibana jala Tuhan ni angka tuan (1 Tim. 6:15). Alai taboto ma, ia harajaon ni Mesias i ndada songon rumang harajaon portibi on, harajaon rohani (kerajaan Allah) do.Molo didok di ayat 3 adong ari parporangan, dalam arti parporangan rohani do i maralohon huaso haholomon. Ro ma marrongoman angka bangso (laskar rohani) ni Mesias i marpahean habadiaon di ari parporangan rohani i. Ro sian ampuan ni andostorang (kandungan fajar) tampil dengan semangat keremajaan songon nambur na lambok jala sejuk laho manghamonangkonon paraloan haporseaon i.

Tohonan hamalimon ni Mesias i tohonan naung diuarihon Debata do i. Konsekuen do Debata di HataNa. Ndang  solsolanNa  uariNa ala ni angka na masa. Tohonan/jabatan hamalimon ni Mesias i ndang terbatas masa berlakuna (temporer), sandok ro di salelenglelengna do i. Jala rumang ni hamalimonna i mangihuthon horong ni si Melhisedek do (ayat 4). Jaha 1 Ms.14:18-20, Raja ni huta Salem huhut malim ni Debata na mamunjung ). Ala Malim dohot Raja do Mesias i tontu marhagogoon jala marhuaso do Ibana mangaleksehon angka parhuaso na jahat di tano on (ayat 5) Dabuona ma uhum tu angka bangso parbegu na sai maringan dibagasan huaso hajahaton, na manginsahi hasintongan ni Debata,na  marsomba tu angka ganaganaan. Ragehonon ni Mesias Raja i ma i sude gabe bangke na marserahan.Rosahanna ma ulu (=kepala/raja ) ni angka harajaon na bidang jala na  gogo ni tano on, ingkon patu saluhutna tu toru ni huasoNa na mahabesar i (ayat 6). Di parporangan rohani i,tongtong do angka parangan ni Tuhan  i  manginum aek sian sunge di dalan (maksudna, manjalo pargogo sian Tuhan i asa tongtong memiliki semangat na gara,dirgak jala tegar manghamonangkon parporangan i–ayat 7 ).

Hahonaan ni turpuk:

• Tutu do Jesus Mesias i Malim na bolon na mamelehon diriNa  tu hamatean bahen tobus ni dosanta. Hehe do Ibana sian hamatean. Tutu do Ibana do Raja na manaluhon huaso haholomon i. Dung i dipatimbul Debata ma Ibana muse marhite hananaekNa tu banuaginjang, hundul di siamunNa. Raja do Ibana di banuaginjang dohot di tano on. Jala ingkon marsomba saluhut tu Ibana.

• Di banua ginjang do Kristus i nuaeng dung dihamonangkon Ibana hita maralohon huaso ni dosa. Angka paranganna do hita. Tajalo ma pahean sinjata habadiaon i, tapangido ma gogo sian Ibana asa margogo hita manghamonangkon paraloan haporseaon i.

Ditulis oleh: Pdt. S. J. Lumbangaol, S.Th.

Formulir Data Singkat Perusahaan