Jamita Kebaktian Sektor Minggu ke-1 Bulan September 2010

Jesaya 2 : 1 – 3

oleh : Pdt. S.J. Lumban Gaol, STh

• Tarjou Si Djesaya gabe panurirang hira-hira di abad paualuhon tagan so Kristus.Na mangula do ibana di ombas ni opat raja na mangarajai hatiha i di Jerusalem Juda (Israel Selatan) ima : Usia ,Jotam, Ahas dohot Hiskia. Songon naposo ni Debata,dilehon Debata do tu angka panurirangNa karunia /kemampuan tertentu di na mandalahon ulaon hapanurirangon i. Rupani pangungkapon (=penglihatan) mamereng dao tu jolo aha ma na naeng masa di angka ari na naeng ro. Angka na naeng masa i boi do baga-baga las ni roha,boi do lumba-lumba uhum hamagoan. Domu tu turpukon, Debata mangalehon pangungkapon tu panurirang Djesaya  khusus marnida taringot tu Juda dohot Jerusalem. Juda maksudna harajaon Israel Selatan secara umum,jala Jerusalem sebagai pusat (ibukota) ni harajaon.

• Songon dia ma diida Si Jesaya  taringot tu  Juda dohot Jerusalem di ujung ni angka ari ? Ujung ni angka ari (=hari hari yang terakhir ) na nidokna  di son boi do i ujung  ni harajaon Israel secara khusus,alai boi do i ujung ni hasiangan on (= akhir zaman) secara umum. Ujung ni angka ari i ,boi do  ribuan taon na naeng ro,boi do jutaan taon na naeng ro,manang lobi sian i. Relatif do i jala holan Debata do umboto pastina, ai guru di Ibana do tingki.  Na rumingkot  ima, marhatutuhon huhut managam bahwa na naeng masa i pasti do saut (terwujud). I do. Dipaboa Debata , ia na masa di ujung ni angka ari  ima : Hot do di tano Juda ,di punsu ni angka dolok, – (maksudna  di angka inganan na timbo, ndang di inganan na toru/robean)- , ojak bagas ni Jahowa. Ala  di atas dolok na timbo do bagas ni Jahowa i, patar ma i tarida tu sandok humaliang idaon ni nasa mata. Lapatanna, di ari sogot,Jerusalem do na gabe pusat  panatapan, pandang situjuon, pusat peribadahan/parsombaon tu Debata Jahowa (pat.Jer.3:17).

• Tutu mamereng keadaan dohot pangalaho hatiha i di harajaon Juda dohot Jerusalem, angka na so hinalomohon ni roha ni Debata do dipaulaula bangso i. Ndang mendukung idaon  karakter dohot kesetiaan nasida molo dipahombar tu baga-baga ni Debata i. Ai dua ratus taon kemudian (abad pa 6 hon),dungkon pangungkapon on,tarbuang do halak Israel Juda tu Babel. Holan i tutu,ndada pingkiran ni jolma pingkiran ni Debata jala ndada dalan ni jolma dalan ni Debata. Molo nunga dipatubegehon Debata rencanaNa/bagabagaNa, pasti saut do i.  Asa molo didok Debata ,bahwa torop angka parbegu dohot angka bangso ro marrongoman tu Jerusalem-Juda di ujung ni angka ari,ndang boi so masa i. Idaon ma disi halongangan na balga. Ndang holan ro boti sada-sada parbegu i sian ganup ingananna be,alai huhut do masiharaan/masibetabetaan. Tarbege do muse pengakuan tulus sian pamangan nasida mandok: “Beta hita tu bagas ni Debata ni Si Jakob,asa diajarhon tu hita angka dalanNa,mardalani hita di angka lapangNa. Ai marharoroan sian Sion (=Jerusalem) do sogot patik i,jala sian Jerusalem do hata ni Jahowa” . Lapatan ni i : Aha pe didok parbegu manang bangso di tano on komentarna dohot penilayanna hian taringot tu Jerusalem,na torang  fakta di ari parpudi do na mangkatai (sitindangi). Di ujungna saluhut nasida  ingkon mangongku : Holan sasada Debata Jahowa Debata sisombaon jala sioloan. Holan bagas ni Debata Jahowa do bagas parsombaon/peribadahan na sintong.Holan Patik ni Debata do na mangajarhon dalan/lapang na tigor.

Panimpulina: Manuju tu ujung ni angka ari do pardalanan ni tingki on.Ndang taboto sadia leleng nari asa  sahat tusi. Alai porsea do hita na harajaon ni Debata do na manggohi portibi on.Molo pe torop nuaeng na so porsea, alai di ujungna nasa bangso ingkon marhatopothon holan Sasada  Debata  Jahowa do Tuhan jala