Jamita Kebaktian Sektor Minggu – 5 bulan Juni

Job  28:1-12

Pdt. S.J. Lumban Gaol, Sth

Si Job, sada halak na na daulat jala na burju huhut mabiar mida Debata.  Ditubuhon do pitu anak dohot tolu boru.Keluarga na berbahagia do nasida. Tarbarita do si Job on na mora jong di luat i. Jotjot do keluarga on  patupa panggalangon tu angka donganna sahuta. Hape tompu ma songgop sitaonon bolon: Mate sude ianakhonna,mago dohot  artana. Si Job sandiri pe ingkon manaon parsahiton na posi,ingkon hundul dibagasan sirabun huhut mangkoisi dagingna na puruon i. Tragis do na masa i,ai suhar-suhar ni parngoluaon na salpu i ma nuaeng diahap. Na tabo hian gabe paet. Alai sude na masa  i dibagasan pamotoan ni Debata do i.

Sahat do barita parsorion ni si Job on tu na tolu ale-alena i: Si Elipas,Si Bildad dohot Si Sopar. Manigor dihalaputi nasida  do ro maningkir mangapuli si Job. Dipatuduhon nasida do rasa kesetiakawananna dohot keprihatinanna marhite na mangangguhi tumatangis ,jala rap hundul dohot si Job manangkas tu tano i pitu ari pitu borngin lelengna . Dunghon i muse ganup do nasida na tolu mandok hatana be  domu tu parsorion na niae ni si Job i. Sintuhu ni hata nasida ima: Ndang tarbahen mago manang pesan jolma na lidang jala na tigor marroha.Alai ndang adong sada pe jolma na  tigor/pintor ianggo  maradophon Debata . Tigor do tongtong uhum ni Debata tu nasa jolma. Ala  ni hajahaton dohot dosa ni jolma do umbahen songgop hinamago dohot pardangolan. Alani i,si Job sandiri pe dirajumi ma i jala benget ma manaon pardangolan i. Unang ma dipintori dirina diadopan ni Debata.

Marsorinsorin do dialusi si Job alealena na tolu i hombar tu angka hata nasida be.  Turpuk epistel on ima deba sian angka  alus ni Job tu si Bildad. Domu tu parsorionna i,tongtong do dipartahanhon si Job hatigoranna (kebenaranna), na so ala ni hasalaanna manang dosana umbaen na marsidangolon ibana (27:5-6). Tutu, ndang  hasigatan jala ndang tardodo jolma dalan,pingkiran,habisuhon dohot hapistaran ni Debata. Godang do na boi risihan,sigatan,luluan ni jolma sian angka na tinompa ni Debata di tano on.Alai ianggo hikmat ni Debata tung so boi dapot jalahan ni jolma i. Rupani,perak dapot do buaton i sian panambangan, sere sian pangaragaanna (ay.1).Bosi dapot do diolah sian tano,jala batu pe boi do dilala bahen tombaga (ay.2).Lapatanna,ilmu pengetahuan ni jolma mampu do mengolah bahan-bahan na adong di tano on gabe marguna. Angka inganan na holom manang tanobatu pe i boi do diruang tu bagasan sabagasbagasna jala sadaodaona gabe dapotsa ma disi aek/sunge.Sisik ni tano parginjangna menghasilkan pangan, jala  parbagasanna diolah denggan gabe jumpangsa ma disi mata intan sapir dohot sere na marhimpalhimpal (ay.3-6).Inganan pambuatan ni angka batu na mararga i buni do i ,ndang dapot idaon,boluson ,bongotan ni angka binatang i. Mansai atur do pengolahan dohot pengelolaan tambang pambuatan ni angka batu/arta na arga i dibahen asa sai tongtong boi berproduksi (ay.7-11). I ma capaian maksimal hasil kerja keras na boi patuduhonon ni jolma

Domu tu hatorangan na di ginjang i.Na nidok ni si Job disi bahwa na boi do dilului jolma i arta na arga situtu di tano on marhite na usaha keras sahat tu na menggali sabagas-bagasna tu toru ni tano.  Alai ianggo hapistaran/habisuhon manang hikmat ni Debata di dia ma dapot jumpangon ni jolma i ? Ndang tung dapotsa i songon na mangalului arta tano on (ay.12). Laos songon i do  na masa di portibi on,nang na masa tu dirina, ndang tarsigati pingkiran  i, tung hikmat ni Debata do na mangkatai disi.

Sipahusorhusoron:

• Dilehon Debata do tu jolma i parbinotoan (ilmu pengetahuan) sipangkeonna laho mangarisihi ,menggali ,mengolah,mengelola potensi dohot hamoraon ni tano on tu na hasea di jolma i. Songon i ma panarihonon ni Tuhan i di hita di portibi on. Taboto ma i jala tapangke ma angka parbinotoan na tajalo i sadenggan-dengganna tu na hasea di hita .
• Mansai arga do parbinotoan (ilmu pengetahuan) na sian Tuhan i, alai dao ummarga do hapistaran,habisuhon,hikmat. Ndang dapot i luluan songon na mangalului arta na arga na buni bagas di toru ni tano manang batu. Dalanna asa dapot hapistaran  i, holan marhite biar mida Jahowa do (ay.28 , Poda 1: 7).
• Angka na masa di tano on, angka peristiwa na tabolus jala na taadopi di pardalanan ni ngolunta marsadasada,hansit manang tabo,neang manang dokdok,paet manang tonggi,tajalo ma i sude dibagasan kesetiaan mar-Tuhan.Hapistaran ni Tuhan i do na mangula disi.  Jala hikmat na uli ma i parhatopoton ni rohanta.