Jamita Kebaktian Sektor Minggu Ke-1 Maret 2010

Download file format pdf Renungan Kebaktian Sekotor Minggu I Maret 2010

Oleh: Bapak Pdt. S. J. Lumbangaol, S.Th

(Versi Bhs Batak Toba)

Minggu Ke-1 Maret 2010
Turpuk Jamita: II Korint 1:3-7
Hatorangan:
Andorang so tarjou si Paulus gabe siihuthon Tuhan Jesus, halak parise na fanatik bahkan ekstim do ibanan. Mansai jungkat jala late situtu do rohana tu halak karisten si ihuton Jesus. Dohot do ibana hatiha mamunu Diaken Stephanus (Ulaon Ni Apostel 7:58). Gogo do ibana manggaori jala mambahen parbadaan tu halak kristen na adong di Jerusalem. Dilelei, dipukpuhi dohot dihurungi ibana tung ise na dapotna angka halak na porsea di Jesus (Ulaon Ni Apostel 8:1-3). Borhat do ibana manguluhon pangaleleon tu halak Kristen tu luat na asing, rupani tu huta Damaskus, Syria. Disangkapi rohana ingkon siaphononna do sandok halak Kristen dohot pangajaran hakaristenon sian tano Israel dohot na humaliang na. Alai dung ditangkup Tuhan Jesus ibana andorang di pardalananna tu huta Damaskus, gabe muba total ma hadirionna, patu (tunduk) tu hagogoon dohot huaso ni Jesus. Dungkon i, gabe siihuthon Kristus na burju ma ibana jala gabe sada apostel na pararathon barita na uli.

Tu angka bangso si pelebegu do si Paulus mamaritahon barita na uli. Pangidoanna do asa gabe apostel ni halak si pelebegu (rasul orang kafir). Diboto ibana do dokdok dohot horas ni ambatan na ingkon adopanna. Songon hansit ni pambaenanna hian tu halak kristen, songoni ma ditaon ibanan muse dibaen halak na so porsea tu Jesus (jaha II Korint 11:23-28). Alai tung beha pe hansitna ditaon jambar ni haburjuonna mangihothon Kristus, satia do ibana. Tarida do i sian pangaradeon dirina sahat tu na mate martir. Di saluhut hahansiton dohot haporsuhonna na tinaonna i, tongtong do las jala hiras (semangat) do rohana mamuji-muji Debata. Beasa boi si Paulus mamuji Debata di bagasan haporsuhon i? Alusna, ala diapul Debata ibana (ayat 4). Lapatanna, Debata na sai tongtong mangalehon gogo partondion tu si Paulus ala hasatiaon nai. Umbahen i do manahan ibanan jongjong manghatindangkon Krsitus. Nang pe godang ditaon na bernit/porsuk, laos godang do apul-apul dijalo sian Tuhan i. Gariada tahe sumurung pangapulion dilehon Tuhan i martimbangkon angka saluhut haporsuhon i (ayat 5).

Haporsuhon na tinaon ni Kristus bahen haluaon ni saluhut jolma. Si Paulus sandiri pe didok ibana do, ia angka haporsuhon na tinaon ni angka parbarita na uli bahen pangapulon dohot haluaon do i tu angka huria ni Tuhan. Lapatanna, marhinorhon jala marpanumpak do i tu angka halak kristen na porsea. Panumpakna ima, gabe boi nasida songon angka parbarita na uli i, sabam roha na sida, marhabengeton nang pe manaon na hansit. Asa ndada holan tu angka apostel i dilehon Tuhanta pangapulon dohot haluaon, alai dohot do i dilehot nang tu hita pe angka ruas na porsea (ayat 6).

Di na marsitaonon na porsuk angka apostel i ala manghatindangkon barita na uli, ndanda asa holan diri nasida na tarpuji jala partohap di angka apul-apul na sian Tuhan i. Ndang! Angka ise halak na manaon naporsuk ala ni barita nauli i, angka apostel songon i nang angka huria, rap partohop do i saluhutna di apul-apul na sian Tuhanta pardenggan basa i (ayat 7).

Hahonaanna tu turpuk:

• Goar ni minggu: “Letare” (marlas ni roha ma hamu!). Las jala hiras do roha ni angka na porsea i atik pe sipata manang jotjot nasida manaon di pardalanan ni ngolu hakaristenon na ala adong do Debata pangondian na sai tongtong mangalehon gogo, pangurupion dohot pangapulon di angka na satia.
• Topik minggu: hot do padan ni Debata tu na sandok halak na porsea. Padan na didokna ima “haluaon” (keselamatan). Saluhut na porsea na manaon ala ni barita na uli ni Kristus do na manjalo haluaon i. Alai molo manaon halak dibahen pangalaho na jat, ndang taruli i di haluaon, atik pe halak kristen ibanan. Tu api narokko do jolma si songoni dabuhononna.

Doc. HKBP Malang Maret 2010 | Copyleft 2010 (alias boleh disebarluaskan untuk tujuan non-commercial asal mencantumkan nama pengarang tersebut di atas)

Download file format pdf Renungan Kebaktian Sekotor Minggu I Maret 2010

Oleh: Pdt. S. J. Lumbangaol, S.ThMinggu Ke-1 Maret 2010
Turpuk Jamita: II Korint 1:3-7
Hatorangan:
Andorang so tarjou si Paulus gabe siihuthon Tuhan Jesus, halak parise na fanatik bahkan ekstim do ibanan. Mansai jungkat jala late situtu do rohana tu halak karisten si ihuton Jesus. Dohot do ibana hatiha mamunu Diaken Stephanus (Ulaon Apostel 7:58). Gogo do ibana manggaori jala mambahen parbadaan tu halak kristen na adong di Jerusalem. Dilelei, dipukpuhi dohot dihurungi ibana tung ise na dapotna angka halak na porsea di Jesus (Ulaon Apostel 8:1-3). Borhat do ibana manguluhon pangaleleon tu halak Kristen tu luat na asing, rupani tu huta Damaskus, Syria. Disangkapi rohana ingkon siaphononna do sandok halak Kristen dohot pangajaran hakaristenon sian tano Israel dohot na humaliang na. Alai dung ditangkup Tuhan Jesus ibana andorang di pardalananna tu huta Damaskus, gabe muba total ma hadirionna, patu (tunduk) tu hagogoon dohot huaso ni Jesus. Dungkon i, gabe siihuthon Kristus na burju ma ibana jala gabe sada apostel na pararathon barita na uli.