Jamita Kebaktian Sektor Minggu Ke-3 Bulan Maret 2010

Download file dalam format .doc

Oleh: Bapak Pdt. S. J. Lumbangaol, S.Th

(Versi Bhs Batak Toba)

Minggu Ke-3 Maret 2010
Turpuk Jamita: Rom 3:21-26
Hatorangana:

Di halak Jahudi, patik (taurat) do dasor ni saluhut poda parugamoon. Patik do sintuhu ni peribadatan (parsombaon) tu Debata. Ala patik do dasor/sintuhuna, dibahen i ingkon ulahonon jala radotan nasida do i saburju-burjuna dohot sadenggan-dengganna, ai marhite i do nasida pintoran ni Debata asa dapotan haluaon. Hatontuan na tangkas do i na so sitawar-tawaron hatingkosanna. Songon i ma pangantusion ni si Paulus na jolo i tagan Parise dope ibana. Alai dungkon muba rohana bage siihuthon Kristus, diboto ma ndang tingkos hape pangantusionna i taringot tu fungsi dohot lapatan ni patik.

Huria Rom (tujuan ni surat on), torop do ruasna na marharoroan sian Jahudi, asing ni angka halak Rom dohot etnis na asing. Hira na dominan do pengaruh ni halak Kristen na sian Jahudi i di huria i. Atik pe naung gabe Kristen nasida alai sai dipartangkangkon do pemahaman poda ugamo Jahudi i na mandok boi pintor/tigor jolma i marhite na mangulahon patik. I ma nuaeng dipatorang Apostel Paulus apala tangkas di turpuk on. Ndang adong nanggo sada pe jolma; beha pe usahona, beha pe gogona, beha pe radotna, beha pe parsitutuonna, asa sandok sempurna ibana mangulahon patik i, tung so tarbahensa do i. Alani i do umbaen dipapatar Debata hatigoranNa (kebenaran) na so sian patik I (ayt. 21). Antong molo ndang sian patik i, sian dia ma? Alusna ima; sian haporseaon di Kristus Jesus (ayt. 22). Torang ma; hatigoran ni Debata ndang di patik, tung di Jesus Kristus do. Songon na nidok ni Apostel Paulus: Kristus do ujung ni patik i, laho mamintori nasa na porsea (Rom 10:4).

Sude do jolma mardosa, ndang mardia imbar manang ise pe. Ndang adong nanggo sada dapot pujion ni Debata ala ni parulanna.Halak Jahudi pe, unang ma dietong rohana, ala bangso na pinillit ni Debata nasida mangihuthon sejarah, jala tu nasida do dilehon Debata patik i, gabe dapot pujion nasida disi? Ndang! (ayt. 23). Ala ndang boi jolma i sipujion (= sempurna) sian dirina, umbaen gabe dipintori Debata. Asi ni roha ni Debata do na dibasabasahon (dengan cuma-cuma) laho manobus jolma i marhite Kristus Jesus (ayt. 24). Kristus do dipadiri (ditentukan) Debata bahen habangsa parasian (= jalan pendamaian), asa patar hatigoranNa (keadilanNya) di portibi on paboa na pintor (benar) do pambahenanNa na mamintori (membenarkan = paluahon) angka na porsea di Jesus Kristus. Songon nidok ni Ep. 2:8 “Ai sian asi ni roha do umbaen na malua hamu, dalan haporseaon; jala ndada binahenmuna, silehonlehon ni Debata do.”

Hahonaan tu jamita:

• Di tata liturgi HKBP sai dijahahon do patik ni Debata na sampulu i. Na mangingothon do i tu hita na jolma pardosa do hita, jala asa tangkas tatanda dosanta. Ia malua hita sian dosa ala pangasii ni Debata do.
• Di diri ni Jesus do patik i dipaujung (= disempurnakan). Haporseaonta di Jesus Kristus do mamintori hita asa gabe taruli haluaon.
• Thema minggu: “Marpanatap do Jahowa tu na porsea“. Sintong! Hita na porsea huhut burju marsihohot di Kristus ro di ujung ni ngolunta,sai na tatapon ni Debata do hita.

Doc. HKBP Malang Maret 2010 | Copyleft 2010 (alias boleh disebarluaskan untuk tujuan non-commercial asal mencantumkan nama pengarang tersebut di atas)

Download file dalam format .doc