Jamita Kebaktian Sektor Minggu Ke-3 Bulan April 2010

Oleh: Pdt. S. J. Lumbangaol, S.Th

(Pendeta Resort HKBP Malang)

:: Nats Alkitab: Sepania 3:14-20

Panurirang  Sepanya mangula hira-hira di abad pa pituhon andorang so Kristus (SM), hatiha raja Josia mangarajai di Harajaon Juda (Israel Selatan. Tardok satingki do ibana dohot pan Jeremia dohot pan Nahum. Tarbarita do raja Josia on Raja Reformator, ala habaranionna patupa haimbaruon total di Juda marhite na manutung/menghancurkan nasa ganaganaan dohot inganan pamelean tu sombaon sian tano Juda. Mewajibkan halak Israel asa mangaradoti patik, mulak marsomba tu Jahowa. Merayakan Paskah na so dung hea be dipestahon mulai  sian tingki ni Panguhum (2 Raj. 22-23). I ma denganna parrohaon ni Raja Josia on na pola digoari raja na so adong tudosanna sian angka raja na di jolona dohot di pudina pe (2 Raj. 23:25). Alai atik pe naung adong haimbaruon i jala prosesna nunga mardalan di tongatonga ni halak Juda, alai ianggo   pinsangpinsang dohot torutoru ni Debata ndang boi so mardalan, ima ingkon bolongkonon ni Debata Jerusalem dohot Bagasjoro i. Ala nunga sanga tung marsigorgor rimas ni Debata mida bangso i ala hajahaton ni raja Manasse (raja na di jolona/ompung ni raja Josia), na paloas angka parsombaonan tu ganaganaan.

Tajaha andorang so turpuk on, didok Debata marhite pan. Sepanya tu bangso i, paboa nunga marjea be huta (maksudna Jerusalem) na gonting, na ramun,dohot siulahon gogo i. Nunga dipaloas Debata bangso parbegu laho mangalengsehonsa. Ingkon tarulang huta i, manalisik alamanna, soada pamolus, langa nang pangisina (ayat 1-8). Uhuman na dokdok  na so haambatan  so ingkon songgop. Tinggal paimahon tingkina nama. Tutu do antong ro torutoru i. Ai ndang sadia leleng nari, ro ma bangso parbegu (Babel) mamorangi Juda, dilohai ma huta na gonting i dohot bagasjoro na uli i, ditaban ma torop halak Israel Juda jala diboan tu Babel. Na masa do i hirahira di taon 586 BC  (Andorang so Kristus).

Ia Debata Jahowa, patar do di angka hataNa songon i nang ditindakanNa/pambahenanNa pe. Molo didok Ibana ingkon hona uhum bangsoNa, saut do i masa. Molo dibagabagahon Ibana muse apulapul dohot pemulihan tu bangsoNa, saut do i lehononNa. Laos i do na taida di turpuk on. Uhuman ni Debata tu bangsoNa ndada na naeng paintophon eksistensi ni bangsoNa i. Dao ma i. Molo pe diloas Debata ditaban halak parbegu nasida, linsing-linsing holong do i. Asa dipauba do pangalahona na jahat i. Alani i do umbaen didok: ”Mariaia ma ho,ale boru Sion! Marolopolop ma ho ale Israel………, marlas ni roha ma ho ale boru Jerusalem! (ayat 14). Seruan i pataridahon uli ni roha ni Debata mangunsat uhumNa na dokdok i, mangalehon grasi-pengampunan. Naung dipaholang Debata hian panatapna sian bangsoNa, gabe ditailihon muse. Naung marhinamago (ditimpa malapetaka) hian, gabe dapotan tua muse. Roha na tahuton dohot tangan na lenduk (lemah lesu), gabe hinsa muse,ala manjalo spirit/semangat sian Jahowa Ulubalang i (ayat 15-17).

Ndang holan pemulihan semangat jiwani na naeng patupaon ni Debata tu bangsoNa, dohot do pemulihan pisik,ima:manjou angka na holang (marserak) di  na dao asa pungu, pahehehon angka na ninondonan ni haurahon dohot pangarupaon (penindasan), pamalumhon angka na mengkat, papunguhon angka na pinabali. Nasida na manjalo hamalumon i bahenon ni  Debata ma i gabe pujipujian jala gabe barita panindangion tu  na humaliang (ayat 19). Alai apala na manghalashon situtu songon puncak ni pemulihan i, ima: Hamumulak ni bangso i sian tano habuangan, ditogihon Debata sian angka inganan na marserak i  asa sada marpungu tu tano Juda, tu huta Jerusalem. Halongangan bolon do i sipamasaon ni Debata. Jala gabe barita hamuliaon do i di tongatonga saluhut bangso di tano on (ayat 20).

:: Hahonaan ni turpuk:

• Goar ni Minggu: “Jubilate” namarlapatan “marolopolop” tu Debata ma sandok. Dihalomohon Debata do ngolunta asa ngolu na marolopolop na marlasroha. Molo taula na roa/jahat, patut do mangonai uhumNa tu hita. Alai di ujung ni uhumNa i dibagabagahon do hamalumon/pemulihan pisik.