Jamita Kebaktian Sektor Minggu Ke-2 Bulan April 2010

Andung 3 : 22- 26

Panurirang Jeremia mangula hira-hira di abad papituhon andorang so Kristus,tingki raja Josia,Joyakim, Joyakin dohot Sedekia mangarajai di Israel Juda ombas i. Lam  tangkang do pangalaho ni bangso i diida panurirang Jeremia ,tarmasuk angka parhuaso dohot malim. Gogo do dipinsang si Jeremia nasida asa muba.Molo ndang muba,paloason ni Debata ma halak parbegu mangago nasida dohot mangalengsehon huta Jerusalem.Alani i gabe ingkon manaon na hansit   si Jeremia ;dipungkuli, dirante, dihurungkon,didabu tu godung na bagas na gok gambo. Tutu ma antong,ndang sadia leleng nari,ro ma harajaon Babel mangalotloti Jerusalem.Torop sian bangso i ditaban tu Babel,alai ianggo angka warga partoru na so margello ditebahon do.Sanga do pan.Jeremia dirante naeng ditawan,alai gabe dipalua komandan parangan ni Babel i do muse ibana tading di Jerusalem.

Mangangguhi do si Jeremia mangandungkon hinamago ni bangso i dohot huta  Jerusalem /Bagasjoro naung magargar/maloha i. Bangso na tarbarita na jolo jala disegani bangso na humaliang,nuaeng gabe marlea.Aha ma na boi tardok si Jeremia so holan mangarsakhon huhut mangalualu tu Debata.Godang do ditaon ibana na dangol (sengsara),pangaleleon (pengembaraan ),raru (ipuh) dohot rasun (racun) ala manoarahon hasintongan ni Debata holan asa unang sanga lalu rimas ni Debata na dokdok i.Hape ndang di pekhon bangso I (ay.19).Nang pe songon i,ndang gabe hansit rohana manang mandele,dipasahat do tu Debata asa sai dipaingotingot Debata ibana di parungkilonna I marhite na apulan,pargogoan,donganan ni Debata ibana ganup tingki,dungi gabe sabam ma rohana di bagasan manaon sasudena Ii(ay.20).Hasabamon ni rohana i,ndang hasabamon na passip (ngongong),hasabamon na aktip na marpangkirimon do.Lapatanna,atik pe mansai porsuk jala dangol diae ibana dohot bangsona,mangkirim do ibana na pasti adong perubahan patupaon ni Debata di ari na ro (ay.21).

Mamereng sian hajahaton  dohot roa ni pangalaho ni bangso i,uhuman na hombar do na mangonai tu nasida na boi mambahen sun siap (sirna ) nasida.Hape tumimbo do asiasi ni Debata Jahowa mangatasi murukNa.I do umbaen didok si Jeremia : Asiasi ni Jahowa sambing jala na so marpansohotan i do na manganju jala paloashon nasida mangolu (ay.22).Molo muruk pe Debata rupani di ari on,alai marsogotna i mulak rata do asi ni rohaNa. I ma hadirion,bangko/sifat dasar ni Debata na murni, na ias jala na gok habonaron i (ay.23).Dibahen i ma umbaen las roha ni panurirang i,mangongkuhon dibagasan tondina : Debata do parjambaranna dohot pos ni rohana.Lapatanna,tindakan dohot perbuatan ni Debata na mangonai tu bangsoNa pasti mardalan dibagasan asi dohot holong ni rohaNa (ay.24).Ndang dendam na mambahen hamagoan/hasisiap ni bangsoNa.Alani i ma dijouhon panurirang on tu ganup jolma asa marhaposan tu Debata, marsitutu sian nasa roha dohot tondina mangalului Debata jala burju mangkalungunhon hatuaonNa.Taruli ma i di denggan basa dohot tua sian Debata (ay.25-26).

Hahonaan ni turpuk:

• Topik:Manghamauliatehon  asiniroha ni Debata.Hombar do I tu Goar ni Minggu:                               Mis.Domini=Gok asi ni roha ni Jahowa do tano on.Asi ni rohaNa I do na mambahen hita mangolu jala marhasonangan.Alani tama situtu taargahon i .Ingkon ngolu na umboto mandok mauliate (bersyukur) dohot marpujipujian do ngolunta saleleng mangolu hita di tano on.Unang ma gabe sabalikna,atehe ?