Jamita Partangiang Sektor 5 Mei 2010

Pdt. S.J. Lumbangaol,  S.Th

:: Nas Khotbah: I Timoteus 2 : 1 – 7

Sangajo do Apostel Paulus manongos surat on tu siseanna si Timoteus na ditugashon ibana mangula di Huta Epesus. Ulaon na borat do manghatindangkon barita na uli, manghobasi huria, marmahani biru-biru ni Debata. Alani i do umbaen sai diparbohali si Paulus siseanna on asa tau jala margogo mangula ulaon i. Tajaha di bindu sada i, angka  ruhut sirodihonon, sipodahonon ni si Timoteus tu angka ruas ni huria i  ima, asa tongtong nasida mabiar mida Debata, hot marhaporseaon, tutu ma dipaholang dirina sian angka tabiat/bangko haholomon i, ndang be berkiblat tu pudi tu na jolo i, alai  mamandang tu jolo nama tu hatiuron i  ima  Kristus i.

Didok si Paulus do: “Songon parmahan di tonga-tonga ni angka huria tontu ndang holan marjamita, mangajari, mamodai, manogunogu na rumingkot siulahononna/siradotanna.” Baliksa tahe didok ibana, ia siulahononhon na parjolo situtu ima: partangiangon, parpangondianon dohot hamauliateon (menaikkan permohonan, doa syafaat dan ucapan syukur). Angka ise ma sihophoponna di partangiangon i ? Ima saluhut halak (angka bangso parbegu na so umbege barita na uli, angka na so porsea dope, asa ungkap roha nasida manjangkon barita na uli i muse). Dungi angka raja dohot saluhut parhuaso. Boasa tangianghononhon i? Ai angka parhuaso do na gabe musu ni huria. Asa tigor uhum nasida, denggan mamangke sahala na jinalona sian Debata (Rom 13), asa marhasonangan jala so hariborioan masyarakat i dibagasan hadaulaton dohot hahormaton (hidup saleh dan berkehormatan, ayat 1-3).

Ianggo di roha ni Debata naeng asa malua (selamat) do saluhut jolma na tinompaNa i sian huaso haholomon,sian roha hageduhon. Ai ala ni dosa  do umbaen dao jolma sian hasintongan i. Songon na nidokna di Hes. 18:23 i: Na so dihalomohon Debata hamatean ni parjahat i, alai muba ma nian rohana sian dalanna nasai laon asa mangolu ibana. Domu tu tujuan na mulia i do umbaen di suru Debata “Pangulu” (Pengantara), ima Jesus Kristus. Hapanguluonna ndang sebatas padomuhon jolma i tu Debata dalam arti berkompromi dohot Debata. Ndang! Hapanguluon ni Jesus berperan sebagai korban tebusan, maneahon diriNa/hosaNa gabe pelean na mangolu demi pardomuan ni jolma tu Debata dohot haluaon  sian huaso ni dosa (ayat 4-6).

Tugas utama ni si Paulus umbaen dipabangkit Tuhan Jesus gabe Apostel ,ima laho manjamitai,mangajari dohot mangarahon angka halak sipelebegu na di haholomon i, asa olo manjangkon barita na uli, jala gabe halak Kristen na burju ,na  porsea di Jesus Kristus jala mangolu dibagasan hasintongan (ayat 7). Laos songon i ma dihirim apostel Paulus nang tu si Timoteus. Umbaen dipabangkit ibana gabe naposo ni Tuhan i, laho pararathon barita na uli i do jala mangarahon halak sipelebegu tu Tuhan Jesus.

:: Hahonaan ni turpuk:

• Hombar tu goar ni Minggu ima “Rogate” (martangiang). I do apala na rumingkot ulahonon ni angka naposo ni Debata, tamba ni ulaon marjamita dohot mangajari. Ai marpanghorhon situtu do i tu hatutulus ni panghobasion di huria i.
• Uli manang parbue na dihirim marhite partangiangon na marsitutu (sungguh-sungguh) manangianghon saluhut jolma dohot pangomgomi, ima: asa jumpang suasana na marhademahon, sonang so hariboriboan di sude inganan.
• Topik Minggu: Sai na tulus do pangidoan (tangiang) ni na porsea. Haporseaon do na paluahon/pangoluhon. Ala ni haporseaon boi tarpatupa lan halongangan. Porsea ma hita, asa tulus lomo ni roha ni Debata, ima: sahat barita na uli tu liat portibi on jala saut malua saluhut jolma.