Jamita Partangiangan Sektor Minggu Ke-4 Bulan April 2010

Oleh: Pdt. S. J. Lumban Gaol, S.Th

:: Turpuk Jamita: Psalm 66:16

Digoari do turpuk on Ende sian si David, ala ibana do na patomutomuhonsa. Mansai bagas do panandaon (pengenalan rohani) ni si David  di Debata Jahowa umbaen boi tangkas dipatorang ibana taringot tu kemahakuasaan ni Debata dohot angka pambahenanNa. Isara ni mananda jolma, ndang holan bohi dohot goarna i ditanda, alai dohot do nang roha parbagasanna. Manang mananda buku rupani, ndang holan lampak dohot daftar isina dijaha alai dohot do nang parbagasanna diboto. Songon i ma nang  taringot tu Debata  Jahowa; Marnida, manaksihon, manghilalahon, mangarajumi saluhut na binahenNa tu nasa jolma dohot tu sandok portibi on, ndang so tama marolopolop, marende, marsomba liat portibi on pasangaphon Ibana.

Dipangkilalahon si David do secara khusus pambahenan ni Debata tu halak Israel; Ndatung so marendeende bangso i mamuji pasangap Debata marningot halongangan bolon na pinatupaNa marhite na paruarhon nasida sian tano parhatobanan Misir, manaripari Laut Rara, mamolus parhorsihan, manaripari batang aek Jordan (ayat 6). Jala mamereng kenyataan i, angka bangso na asing pe ndang so  mangongkui hagogoon ni Debata jala patut pasangaphon Ibana ai holan Ibana do Debata na sun gogo na mangatasi saluhut. Lan do hamaolon, rintangan, hasusaan na mansai porsuk diadopi halak Israel uju i, alai tongtong do marngolu hosa nasida, ndang diloas totnasida tarsulandit, diparuar sian api dohot aek, selamat, jala sabam  tongtong roha nasida mandalani beha pe rumang ni keadaan i (ayat 7-12). Laho mensyukuri saluhutna i, aha ma na patut patupaon, pasahaton, lehonon ni angka naung mananda pambahenan dohot denggan basa ni Debata na godang i? Ima, mamboan huhut manombahon angka pelean na hushus tu Ibana di joroNa (ayat 13-15)

Dung dipaboa parpesalmen on panandaonna dohot puji syukurna dohot parbue ni haporseaonna tu Debata, nuaeng dihara (dijou,diajak) ibana ma muse sude angka na manghabiari Debata ,angka na naeng mananda Ibana, asa ro mananginangi jamita panindangionna domu tu angka naung binahen ni Debata tu tondina (ayat 16), asa marhite sian panindangionna i gabe tangkas ma tandaon nasida Debata. Pengakuan dohot panandaon na tangkas di Debata, i do na mangonjar roha dohot pamangan manjou GoarNa dohot mamangke dila marende mamuji pasangap Ibana (ayat 17). Ala borhat sian  roha na tulus, ias manjou dohot mamujimuji Debata, i do umbaen ditarehon Debata sipareonNa manangihonsa. Alai sabalikna, molo soara sian roha hajahaton do i, tung so tarehonon ni Debata sipareonNa manangihon i (ayat 18).

Yakin jala pos situtu do roha ni parpesalmen on paboa  sandok ngoluna, pardalananna dohot  gulmitna, pamujionna dohot endena, haporseaonna dohot tangiangna diparateatehon  Debata (ayat 19). Lapatanna ndang ditulak Debata, alai dibege jala dijalo. Ala ni i do umbahen gok las ni rohana mamuji Debata (ay.20).

:: Hahonaan ni turpuk:

• Mansai godang na denggan naung binahen ni Debata tu dirinta ganup, patut do baritahononta i dibagasan roha mauliate dohot pujipujian.
• Goar ni Minggu: “Kantate” namarlapatan “marende”. Asa marende  hita angka na porsea mamuji pasangap Tuhan Debata, ala olo Ibana manangihon pangidoanta, mamarateatehon  soara ni  tangiangta.