Jamita Kebaktian Sektor Minggu ke-2 Bulan Agustus 2010

1 Petrus 3 : 8 – 12

oleh : Pdt. S.J. Lumban Gaol, STh

Mansai las do roha ni Apostel  i ala nunga lam mangerbang barita na uli tu angka luat ni sipelebegu. Nunga marjongjongan  angka huria di luat na dao. Lam ganda bilangan ni angka na porsea di Tuhan Jesus. Dihirim apostel  i do asa gabe parbarita na uli nian angka ruas ni huria i di ganup ingananna be tu angka pangisi ni luat na humaliang, marhite parange nasida na denggan:“Asa marparange na denggan hamu di tongatonga ni halak parbegu (1  Pet.2:12) Lapatanna,parange na denggan i boi gabe  jamita na mangolu jala na aktual  tu humaliang.

Ala angka sisomba ganaganaan jala naung bagas marurat di hasipelebeguon  pangisi ni luat/huta i,tontu  ndang dihalomohon nasida jongjong disi huria. Marusaha do i mangambati marhite ragam cara. Domu tusi do sosososo ni apostel  i di suratna on: Songon dia ma sikap etis sipatuduhonon ni huria (=halak Kristen ) mangadopi  angka hambatan i ?. Deba sian sikap etis i ma nuaeng taida di turpuk epistel on na mangondolhon: Asa  marlambok ni roha dibagasan holong dohot dame huria i. Na parjolo ,ingkon patuduhononni huria i ma integritasna paboa na saroha jala  sapangkilalaan do nasida sude. Ganup ruas ni huria tangkas do masihaholongan (=saling mengasihi ) satu sama lain,tangkas masiasian jala marpangalaho haserepon (=rendah hati).  I do  punten  siberengon ni humaliang mambahen angur barita ni huria i. Na paduahon ,asa unang adong pamaloson atik pe nalnal diadopi huria i angka insak-insak,rehe-rehe,hajahaton,pangambation/penolakan na koras sian nasida na mangkasogohon barita na uli. Baliksa tahe patuduhonon ni huria ima respon na “lam mamasumasu” tu nasida. Songon pandohan ni Jesus sian hau parsilang i : “ Ale Amang ! Marpamuati ma roham mida  nasida,ai ndang diboto nasida na binahen nasida i “. Ala pamatang ni Kristus do huria i,tontu hata mamasumasu do soarahonon ni huria (=halak Kristen). Halak na olo mamasumasu (na so adong roha pamaloson), i do na  manean pasupasu  sian Tuhan i. Na patoluhon, asa tau (boi,mampu) sasahalak i mamasumasu halak na mamusui ibana tontu ingkon na margogo situtu do ibana menguasai/mengendalikan diri.Terutama dila dohot bibir, ala i do organ na berfungsi manghatai. Asa angka hata na dengan dohot hata pasupasu ma  dihatahon,unang   hata na roa manang na busuk dohot ansi-ansi (=menipu). Na paopathon, asa mangalului jala mangeahi dame. Mamboan dame do umbaen tuat Jesus tu portibi on. Dame i do ditinggalhon jala dilehon di sisean,di hita ,di huriaNa (pat.Joh.14:27). Dame i do bohi dohot missi ni huria. Jala ingkon dame I ma na manggohi sandok tano on. 

Sipahusorhusoron:

• Huria na tutu ima molo saroha,sapangkilalaan,masihaholongan,masiasian jala marhaserepon saluhut ruasna. Dao sian roha pamaloson nang pe diadopi ambat-ambat, insak-insak dohot na jat.Tongtong mamasumasu hatana jala dame rohana.
• Laos i do haulion ni bohi ni huria i na gabe sihalomohonon jala gabe barita na uli tu na humaliang, mamboan pangisi ni portibi on porsea tu Tuhan Jesus Kristus.