Jeremia 23 : 1 – 8
Oleh : Pdt. S.J. Lumban Gaol, STh
Namangula do si Jeremia uju di harajaon ni raja Josia,Joahas,Joyakim,Joyakin dohot Sedekia di Jerusalem-Juda.Tagan si Josia mangarajai di Jerusalem lomo ni roha ni Debata do diulahon , olo manangihon hata ni panurirang Jeremia. Alai dungkon si Joyakim(=Eliakim),Joyakin dohot Sedekia (=Matanya) ,sogo ni roha ni Debata do diulahon nasida jala ndang olo manangihon hata ni panurirang, gariada tahe dimusui . Alai ndang holan angka parhuaso na mangulahon sogo ni roha ni Debata,dohot do nang malim. Buktina,ditangkup malim Pashur do panurirang Jeremia , dipungkuli dungi dipamasuk muse tu hurungan (20:1-2). I ma jahat ni roha nasida (=raja dohot malim) tu naposo ni Debata. Ndang disadari nasida,mangulahon sogo ni roha ni Debata doshon na parohon torutoru do i tu diri ni bangso i sandiri.
Raja (parhuaso) dohot angka Malim (hamba Tuhan) dirajumi do i songon “parmahan”di bangso Israel. Ulaon dohot tanggungjawab ni parmahan do manarihon hangoluan ni dorbiana dohot mangaramoti angka dorbiana i asa marhasonangan di ngolu pardagingon dohot partondion. Hape justru suharsuhar ni i do na masa di tongatonga ni bangso i. Ndang be manarihon dohot mangaramoti,alai nunga gabe mangago,paserakhon. Ndang be mamatamatahon punguan ni birubiru i,alai nunga gabe mangonjar (=mencerai-beraikan). Mamereng pangalaho ni angka parmahan i do umbaen ditorui Debata nasida : “Marjea ma (=celakalah) parmahan na mangago dohot na paserekhon biru-biru na huparmahan i ……………”(ay.1). Parmahan (penguasa dohot malim) na menyalahgunakan tohonanna tu hajahaton patut do hona pinsang. Alani torang do didok Debata : “…………..luluhonongku ma (=Aku akan membalaskan) tu hamu hinajahat ni pambahenmuna”(ay.2). Ndang asal didok Debata i,ingkon pasautonNa do i. Jala sintong do dibuktihon di ari na mangihut marhite na mangaloas bangso parbegu manaban Juda,mangalengsehon huta Jerusalem dohot bagasjoro. Ditangkupi do nang angka parmahan dohot torop warga jala dibuangkon tu Babel (jaha 2 Raj.24-25). Alai ala Parasiroha Debata, tung pe diloas bangsoNa i tarbuang jala marserak di tano ni parbegu,ndang laos pasombuonNa nasida ambolong boti disi,papunguon jala boanonNa do mulak muse. PatindangonNa do parmahan na burju laho marmahani nasida muse (ay.3-4). Jala disi ma muse patar idaon nasida huaso ni Debata Jahowa na gogo I na so holan paruarhon sian parhatobanan Misir,alai dohot do nang sian habuangan Babel (ay.7-8).
Sude raja na hea mangarajai di Israel (Utara dohot Selatan) ndang parmahan na denggan roha (=sempurna),atik pe adong do na mangulahon lomo ni roha ni Debata. Si Sedekia do raja na parpudi di sejarah kerajaan Israel,dungkon i ndang adong be. Dunghon zaman pembuangan, dung mulak bangso i sian Babel tu Jerusalem ,rumang na imbaru nama masa di komunitas Israel hombar tu sikon ni zaman na marubauba, sahat tu zaman Pandan na Imbaru. Laos domu tusi do tagamon na nidok ni si Jeremia di ay.5-8 i : Ndang be songon rumang ni harajaon dohot karakter ni angka raja na parjolo i be. Patindangon jala pabangkiton ni Debata nama sian pinompar ni si David sada Raja(=Parmahan) na pistar, na manghajongjonghon uhum(=keadilan) dohot hatigoran(=kebenaran) di Israel (ay.5). Kehadiran ni Raja na marsahala sisongon i pasti mamboan tua dohot suasana na marsonangsonang. Disi ma tarbege soara las ni roha ni torop halak na mandok : Tuhan Keadilan Kita (=Jahowa Parpintoranta). Ala nunga patar hadir keadilan dohot hatigoran i diida,dihilala, jala dinikmati nasida (ay.6). Na laos martudutudu do panurirangon on tu Kristus Mesias ,Raja jala Parmahan na denggan roha I na mamboan Harajaon Banuaginjang I na manghajongjonghon uhum dohot hatigoran di tano on.
Sipahusorhusoron:
- Sunggul-sunggul jala singot-singot do on tu sude halak na targoar parmahan (=pemimpin bangsa,agama,gereja,komunitas,parpunguan dohot keluarga), asa burju jala marsitutu mangaradoti tanggungjawabna be hombar tu ulaon,tohonan/jabatan na jinalona. Sai unang adong na menyalahgunakan tohonan/ jabatanna i tu kepentingan dirina,so holan demi hasonangan ni saluhut na pinarmahanna.
- Parmahan na dengan ima na patujolohon uhum dohot hatigoran di haparmahanionna. Panumpakna : Dapotan tua jala marsonangsonang ma bangso,huria dohot punguan i pasupasuon ni Tuhan Debata.
- Dao ma parmahan na jahat sian bangsonta ,hurianta,nang punguanta pe, asa unang hona toru hita. Martangiang ma hita asa gabe parmahan na burju angka na marmahan hita nuaeng. Mabiar mida Debata jala maniru Tuhan Jesus Parmahan na denggan roha i.
Filed under: Kebaktian Sektor |
Leave a comment